ශ්‍රී ලාංකේය සංගීත ක්ෂේත්‍රයට අනුපමේය මෙහෙවරක් ඉටු කළ, ‘ජාතියේ යශෝරාවය’ ලෙස විරුදාවලිය ලත් ප්‍රවීණ ගායිකා විශාරද ආචාර්ය Nanda Malini මහත්මිය සිය දිවියෙන් සමුගෙන තිබෙනවා. මියයන විට 82 වැනි වියේ පසුවූ ඇයගේ අභාවය ශ්‍රී ලාංකේය කලා ක්ෂේත්‍රයට කිසිසේත්ම පියවිය නොහැකි අතිමහත් පාඩුවක් බවයි විචාරකයින් පෙන්වා දෙන්නේ.

1943 වසරේ අගෝස්තු 23 වන දින අලුත්ගම, ලෙවන්දූවේදී උපත ලැබූ ඇය, කොළඹ කොටහේන ශ්‍රී ගුණානන්ද විද්‍යාලයෙන් සිය අධ්‍යාපනය ලබා තිබුණා. T. N. මාග්‍රට් පෙරේරා ගුරුවරියගේ මඟපෙන්වීම යටතේ ශ්‍රී ලංකා ගුවන් විදුලියේ ළමා මණ්ඩපය වැඩසටහනට එක්වෙමින් “බුදු සාදු” ගීතය ගායනා කරමින් ඇය සිය සංගීත ගමන ආරම්භ කරනු ලැබුවා. පසුව 1961 වසරේදී ශ්‍රී ලංකාවේ ප්‍රථම වර්ණ චිත්‍රපටය වූ රං මුතු දූව චිත්‍රපටයේ W. D. අමරදේව ශූරීන්ගේ සංගීත අධ්‍යක්ෂණය යටතේ නාරද දිසාසේකර සමඟ “ගලන ගඟකි ජීවිතේ” ගීතය ගායනා කරමින් ඇය පසුබිම් ගායනයට ද පිවිසියා.

ඉන්දියාවේ Bhatkhande සංගීත විද්‍යාපීඨයෙන් ශාස්ත්‍රීය සංගීතය හදාරා විශාරද උපාධිය ලබාගත් ඇය, ‘සත්‍යයේ ගීතය’, ‘පවන’, ‘හේමන්තයේදී’ සහ ‘පෙම්බර ලංකා’ වැනි අතිශය ජනප්‍රිය ඒකපුද්ගල ගීත ප්‍රසංග සහ ගීත ඇල්බම ගණනාවක් මෙන්ම කුඩා දරුවන් වෙනුවෙන් ‘සින්දු හෝඩිය’ ඇතුළු ළමා ගීත ද රටට දායාද කිරීමට පියවර ගත්තා. ඇගේ විශිෂ්ට ගායන කෞශල්‍යය වෙනුවෙන් හොඳම ගායිකාවට හිමි සරසවි සම්මාන 12 ක් සහ ජනාධිපති සම්මාන 10 ක් ඇතුළු ජාතික හා අන්තර්ජාතික සම්මාන රැසකින් පිදුම් ලබා ඇති අතර, ඇයගේ අවසන් කටයුතු සිදුකරන ආකාරය පවුලේ ඥාතීන් විසින් ඉදිරියේදී දැනුම්දීමට නියමිතයි.