The FBI has opened an investigation into the Argentina Football Association in the United States over alleged money laundering and fraud of $300 million

ඇ.ඩො මිලියන 300කට අධික මූල්‍ය වංචා සහ මුදල් විශුද්ධිකරණ (Money Laundering) චෝදනා සම්බන්ධයෙන් ආර්ජන්ටිනා පාපන්දු සම්මේලනයට (AFA) එරෙහිව ඇමරිකාවේ ෆෙඩරල් විමර්ශන කාර්යාංශය (FBI) සහ එරට අධිකරණ දෙපාර්තමේන්තුව (DOJ) විසින් මූලික විමර්ශනයක් ආරම්භ කර තිබෙනවා.

මෙම විමර්ශනය ප්‍රධාන වශයෙන්ම එල්ල වී ඇත්තේ ඇමරිකාවේ ෆ්ලොරිඩා ප්‍රාන්තය පදනම් කරගත් TourProdEnter LLC නැමැති සමාගම වෙතයි. 2021 වසරේදී ආරම්භ කරන ලද මෙම සමාගම, ආර්ජන්ටිනා පාපන්දු සම්මේලනයේ ජාත්‍යන්තර වාණිජ ගිවිසුම් සහ ප්‍රධාන අනුග්‍රාහකත්වයන් (Adidas සහ Warner Bros. Discovery වැනි සමාගම් සමඟ ඇති ගිවිසුම්) සඳහා මුදල් එකතු කරන නියෝජිතයෙකු ලෙස කටයුතු කර ඇති බව පැවසේ. විශේෂයෙන්ම ඔවුන් විසින් Miami හි ස්ථාපනය කර ඇති නිල කාර්යාල හරහා වාණිජ සහ වෙළඳ නාම ප්‍රවර්ධන අයිතීන් ලබාදීමේදී මෙම මූල්‍ය අක්‍රමිකතාවයන් සිදුවී ඇති බවයි වාර්තා වන්නේ.

Citibank සහ Bank of America ඇතුළු ඇමරිකාවේ ප්‍රධාන පෙළේ බැංකු පහක් හරහා හුවමාරු වී ඇති ඩොලර් මිලියන සිය ගණනක මුදල් ප්‍රමාණයක් පිළිබඳව ෆෙඩරල් අභිචෝදකයින්ගේ දැඩි අවධානය යොමුව ඇත. මින් ඩොලර් මිලියන 260ක් සෘජුවම ආර්ජන්ටිනා පාපන්දු සම්මේලනයේ ආදායම් සමඟ සම්බන්ධ වුවද, තවත් ඩොලර් මිලියන 57ක මුදලක් පැහැදිලි ව්‍යාපාරික පදනමක් නොමැති සාමාන්‍ය පුද්ගලයින් වෙත රහසිගතව බැර වී ඇති බවටද අනාවරණය වී තිබෙනවා.

ඒ අනුව විමර්ශන මෙහෙයවනු ලබන්නේ ප්‍රධාන කරුණු හතරක් ඔස්සේය:

(1) මුදල් විශුද්ධිකරණය (Money Laundering)

(2) බැංකු වංචා (Bank Fraud)

(3) විද්‍යුත් සන්නිවේදන වංචා (Wire Fraud)

(4) බදු පැහැර හැරීම් (Tax Evasion)

මෙම විමර්ශනයට ආර්ජන්ටිනා පාපන්දු සම්මේලනයේ සභාපති Claudio Tapia මෙන්ම, TourProdEnter LLC සමාගම මෙහෙයවන ආර්ජන්ටිනා ජාතික ව්‍යාපාරික Javier Faroni සහ ඔහුගේ බිරිඳ වන Erica Gillette සම්බන්ධ බව වාර්තා වේ.මෙවර 2026 World Cup තරගාවලිය අතරතුරදී ඇමරිකානු බලධාරීන් විසින් ප්‍රධාන පෙළේ සාක්ෂිකරුවන් ප්‍රශ්න කිරීම සඳහා කැඳවීම හේතුවෙන් සමස්ත පාපන්දු පරිපාලනයම දැඩි අර්බුදයකට ලක්ව ඇති බවයි වැඩිදුරටත් දැක්වෙන්නේ.

මෙම අතිදැවැන්ත මූල්‍ය අක්‍රමිකතාවය පිළිබඳ චෝදනා ඉදිරියේදී සනාථ වුවහොත් එය ලෝක පාපන්දු ඉතිහාසයේ සිදුවූ විශාලතම මූල්‍ය අපවාදයන්ගෙන් එකක් ලෙස ඉතිහාසයට එක්වනු ඇති. මේ හේතුවෙන් අදාළ පාපන්දු සංගමයේ ඉහළ නිලධාරීන්ට මෙන්ම ඊට සම්බන්ධ පාර්ශවයන්ට ඉදිරියේදී දැඩි නීතිමය සහ මූල්‍යමය ප්‍රතිවිපාකවලට මුහුණ දීමට සිදුවීමේ දැඩි අවදානමක්ද මතුව තිබෙනවා.