Meta agrees to up to $18 billion settlement and major changes to Instagram and Facebook for teens

ළමුන් සහ යොවුන් වියේ පසුවන්නන් සමාජ මාධ්‍ය සඳහා දැඩි ලෙස ඇබ්බැහි වන අයුරින් සිය යෙදුම් නිර්මාණය කර ඇති බවට එල්ල වූ නඩු ගණනාවක් සමථයකට පත් කරගනිමින්, Meta සමාගම විසින් Instagram සහ Facebook සඳහා දැවැන්ත වෙනස්කම් රැසක් සිදු කිරීමට සහ ඇමරිකානු ඩොලර් බිලියන 18 ක් දක්වා වූ මුදලක් ගෙවීමට එකඟ වී තිබෙනවා. ඇමරිකාවේ ප්‍රාන්ත රැසක් විසින් සමාගමට එරෙහිව ගොනු කර තිබූ මෙම නඩුව මගින් චෝදනා එල්ල වූයේ Meta සමාගම දැනුවත්වම ළමුන්ගේ මානසික සෞඛ්‍යයට හානි වන අයුරින් මෙම වේදිකා සකස් කර ඇති බවටයි.

මෙම නව එකඟතාවයට අනුව වයස අවුරුදු 18 ට අඩු පරිශීලකයින් සඳහා ක්‍රියාත්මක වන ප්‍රධාන වෙනස්කම් පහත පරිදි වනවා:

(1) Instagram සහ Facebook භාවිතය දිනකට උපරිම පැය 2 ක කාලයකට සීමා වන ස්වයංක්‍රීය කාල සීමාවක් හඳුන්වා දීම (මෙහිදී පණිවිඩ හුවමාරුව සහ දිගු වීඩියෝ නැරඹීම සාමාන්‍යයෙන් බැහැර වන අතර, විනාඩි 15, 60 සහ 90 භාවිතයෙන් පසු විවේක ගැනීමේ විරාමයන් ක්‍රියාත්මක වීම).

(2) රාත්‍රී 12 සිට අලුයම 6 දක්වා යෙදුම් භාවිතය අවහිර වන ස්වයංක්‍රීය රාත්‍රී සීමාවක් පැනවීම සහ රාත්‍රී 10 සිට උදෑසන 7 දක්වා Notifications නිහඬ කිරීම.

(3) පාසල් වේලාවන් තුළදී (සතියේ දිනවල උදෑසන 8 සිට පස්වරු 3 දක්වා) Push notifications සම්පූර්ණයෙන්ම පාහේ අක්‍රිය වීම.

(4) ඔවුන්ගේ සටහන්වල (Posts) Likes සහ Reactions ගණන ස්වයංක්‍රීයවම සැඟවීම.

(5) බාලවයස්කරුවන් සඳහා අධික රූපලාවණ්‍ය සහ ප්ලාස්ටික් සැත්කම් ආශ්‍රිත පෙරහන් (Filters) භාවිතය සම්පූර්ණයෙන්ම තහනම් කිරීම.

(6) ඇල්ගොරිතමයකින් තොරව කාලානුක්‍රමිකව සටහන් පෙළගැස්වෙන ක්‍රමවේදය (Chronological feed) සහ Autoplay පහසුකම අක්‍රිය කිරීමට වඩාත් පැහැදිලි අවස්ථාව ලබාදීම.

(7) වඩාත් ශක්තිමත් වයස තහවුරු කිරීමේ ක්‍රමවේදයන්, දෙමාපිය පාලන පහසුකම් (Parental controls) පුළුල් කිරීම සහ මෙම ක්‍රියාමාර්ග පිළිබඳව ස්වාධීන විගණනයක් සිදු කිරීම.

වසර 10 ක කාලයක් තුළ මෙම ගෙවීම් සිදු කිරීමට නියමිත අතර, Meta සමාගම විසින් මෙම වැරදි නිල වශයෙන් පිළිනොගත්ත ද අධිකරණය මගින් අධීක්ෂණය වන පරිදි අදාළ ආරක්ෂිත වෙනස්කම් සියල්ල ඉදිරි මාස කිහිපය තුළදී ක්‍රියාත්මක කිරීමට එකඟතාව පළ කර තිබෙනවා. මෙම එකඟතාව සමාජ මාධ්‍ය ක්ෂේත්‍රය තුළ ළමුන්ගේ ආරක්ෂාව වෙනුවෙන් ගනු ලැබූ ඓතිහාසික පියවරක් ලෙසයි නීති අංශ පෙන්වා දෙන්නේ.