GTA VI nude scene videos have been leaked

GTA VI ක්‍රීඩාවේ තවත් රහසිගත වීඩියෝ දර්ශන පෙළක් මේ වන විට අන්තර්ජාලයට මුදාහැරීමට ‘CyberLeek’ නම් හැකර් කණ්ඩායම කටයුතු කර තිබෙනවා. Leonida සිතියම තුළ පිහිටා ඇති නිරුවත් කඳවුරක් (Nudist community) මෙලෙස අලුතින් කාන්දු වී ඇති දර්ශනවලින් දැකගත හැකි වනවා.

මෙම නවතම වීඩියෝව මගින් ක්‍රීඩාවේ ප්‍රධාන චරිතයක් වන Jason රාත්‍රී කාලයේදී අදාළ නිරුවත් කඳවුරක් තුළ සැරිසරන ආකාරය දැකගත හැකි වනවා. එහිදී විවිධ වයස් මට්ටම්වලට සහ විවිධ ශරීර හැඩයන්ට අයත් සම්පූර්ණයෙන්ම නිරුවත් චරිත (NPCs) ගණනාවක් සිටින අතර, Jason විසින් දුරදක්නයක් (Binoculars) භාවිතයෙන් ඔවුන්ව නිරීක්ෂණය කිරීමට උත්සාහ කිරීමත් සමඟ එහි විශාල ගැටුමක් ද නිර්මාණය වනවා. මෙම දර්ශන පෙළ තුළ සම්පූර්ණ නිරුවත් දර්ශන අඩංගු වන බැවින් එය වැඩිහිටියන්ට පමණක් සීමා වූ අන්තර්ගතයක් (NSFW) ලෙස ද නම් කර තිබෙනවා.

මීට පෙර ක්‍රීඩාවේ විවිධ ස්ථාන රැසක්ම අන්තර්ජාලයට මුදාහැරිය මෙම හැකර් කණ්ඩායම, මෙතෙක් ක්‍රීඩාවේ ප්‍රධාන කතාවට අදාළ කිසිවක් ප්‍රසිද්ධ කර තිබුණේ නැහැ. එහෙත් මේ වන විට ඔවුන් සිය අනුගාමිකයින්ගෙන් ඡන්දයක් (Poll) විමසමින් ක්‍රීඩාවේ තවත් ප්‍රධාන චරිතයක් වන Lucia සම්බන්ධ කතාවේ ආරම්භක දර්ශන පෙළ අන්තර්ජාලයට මුදාහරින්නේද යන්න පිළිබඳව විමසා තිබීම විශේෂත්වයක්. ඊට අමතරව ඔවුන් Rockstar සහ Take-Two Interactive සමාගම්වල කාර්යාල ඉදිරිපිටට පැමිණ ලීක්ස් (Leeks) එළවළුවක හැඩයෙන් යුත් ඇඳුම් ඇඳගෙන විරෝධය පළ කරන ලෙස ද අමුතුම ආකාරයේ ඉල්ලීමක් සිය අනුගාමිකයින්ගෙන් සිදු කර තිබෙනවා.

මෙම හැකර්වරුන් පවසන්නේ තමන් මෙම කාන්දුවීම් සිදු කරන්නේ “Gamers' Rights” යන තේමාව යටතේ පාරිභෝගිකයින්ට අවාසිදායක වන සමාගම් ප්‍රතිපත්තිවලට විරෝධය පෑමක් ලෙස බවයි. කෙසේ වෙතත් ඔවුන් මේ හරහා සිය ක්‍රිප්ටෝ මුදල් ප්‍රවර්ධනයක් ද සිදු කරන අතර, අදාළ වීඩියෝ දර්ශන අන්තර්ජාලයෙන් ඉවත් කිරීමට සහ මෙම පුද්ගලයින් නීතියේ රැහැනට කොටු කරගැනීම සඳහා Take-Two සමාගම මේ වන විටත් දැඩි නීතිමය ක්‍රියාමාර්ග ගනිමින් සිටිනවා.