France becomes the first EU country to ban social media for children

කුඩා දරුවන් සඳහා සමාජ මාධ්‍ය භාවිතය තහනම් කිරීමට පියවර ගත් යුරෝපා සංගමයට අයත් පළමු රට බවට පත්වීමට ප්‍රංශය සමත්ව තිබෙනවා. දරුවන්ගේ මානසික සෞඛ්‍යය සහ ඩිජිටල් ආරක්ෂාව වඩාත් තහවුරු කිරීමේ ප්‍රමුඛ අරමුණින් ඔවුන් මෙම තීරණය ගෙන ඇති බවයි වාර්තා වන්නේ.

වර්තමානය වන විට අන්තර්ජාලය සහ සමාජ මාධ්‍ය හරහා දරුවන්ට එල්ල වන විවිධ බලපෑම් අවම කිරීම සඳහා ලොව පුරා බොහෝ රටවල් දැඩි අවධානයක් යොමු කර තිබෙනවා. එවන් පසුබිමක ප්‍රංශ රජය විසින් ක්‍රියාත්මක කළ මෙම නව නීතිමය පියවර, අනාගතයේදී යුරෝපයේ මෙන්ම ලොව අනෙකුත් රටවල් සඳහාද සුවිශේෂී පූර්වාදර්ශයක් වනු ඇති බවට බොහෝ දෙනා අදහස් පළ කර තිබෙනවා.

ලබන සැප්තැම්බර් මාසයේ ආරම්භ වන නව පාසල් වසර සඳහා මෙම නීතිරීති ක්‍රියාත්මක කිරීමේ අරමුණින්, අදාළ පනත පාර්ලිමේන්තුව හරහා සම්මත කිරීම කඩිනම් කරන ලෙසට ජනාධිපති Emmanuel Macron විසින් එරට රජයට නියෝග කර තිබෙනවා. මෙම නව නීතිය ප්‍රංශයේ ශ්‍රව්‍ය දෘශ්‍ය සහ ඩිජිටල් සන්නිවේදන නියාමන ආයතනය වන Arcom විසින් ඉදිරියේදී බලාත්මක කරනු ඇති.

මීට පෙර වයස අවුරුදු 16ට අඩු ළමුන් සඳහා ප්‍රථම වරට සමාජ මාධ්‍ය තහනමක් ක්‍රියාත්මක කරමින් ඕස්ට්‍රේලියාව රාජ්‍යය පසුගිය වසරේ අගභාගයේදී ඉතිහාසයට එක්වුණා. මීට අමතරව බ්‍රිතාන්‍ය රජය විසින්ද පසුගිය මාසයේදී එවැනිම සීමාවන් ප්‍රකාශයට පත් කළ අතර, ඒවා ලබන වසරේ සිට ක්‍රියාත්මක වීමට නියමිතයි. එමෙන්ම ස්පාඤ්ඤය, ග්‍රීසිය සහ ඩෙන්මාර්කය යන රටවල්ද සමාජ මාධ්‍ය භාවිතය සඳහා මෙලෙස අවම වයස් සීමාවන් පැනවීමට මේ වන විට සැලසුම් කරමින් සිටින බවයි වැඩිදුරටත් වාර්තා වන්නේ.